A Carreira de Rolos nace no ano 2018. É unha idea orixinal e rexistrada do noso presidente honorífico, José Pazos, tamén coñecido como Pepe Mieres.

A carreira, organizada en colaboración co Excmo. Concello de Cuntis, celébrase habitualmente o 15 de agosto, no centro da vila e coincidindo coas festas patronais de Cuntis. Consiste nunha competición lúdico-deportiva na que equipos de toda Galicia, formados por dous homes e dúas mulleres, deben empurrar un rolo ou bolo de herba seca nun percorrido costa arriba duns 300 metros de distancia.

A proba divídese en dúas partes: na primeira, un membro de cada equipo terá que superar unha gincana de obstáculos ata chegar ao punto de encontro cos seus compañeiros. Unha vez dado o relevo, comezan a empurrar o rolo de herba seca ata a meta.

Os equipos, un máximo de 24, compiten entre si en quendas de dous en dous ata que só quedan 12, que realizan de novo o percorrido contra o reloxo. O equipo que complete o traxecto no menor tempo acada o primeiro posto e o premio en metálico.